قدّمت بها الشاعر عصام ملكي عام 1987
رَيِّسْ عصْبِه.. اسْأَلُوا النَّاسْ
عَنْ شِعْرُو.. عَنْ إِحْسَاسُو
بْيِنْبَعْ مِنْ قَلْبُو الإِحْسَاسْ
وِبْيِسْقِي كلّ حْواسُو
حَدُّو ما بْيِتْمَرْمَرْ كاسْ
حْلاوِة هَـ الدِّنْيِي بْكاسُو
وْلَوْ ضَاقِتْ فِينا الأَنْفاسْ
عِصَام مِلْكي بْياخُدْ نَفْسْ
وْبِيعَيِّشْنَا بْأَنْفاسُو
**
قدمت بها الشاعر عصام ملكي عام 1986
رَيِّسْنا بَدُّو يِحْكِي
انْتِبْهُوا لْحَكْياتُو يا ناسْ
مُشْ لازِمْلُو دِرْبَكِّه
صَوْتُو بيرَقِّص الِحْواسْ
أَشْعارُو فِيها الضِّحْكِه
وْفِيها الْحُبّ الْـ ما بْيِنْقَاسْ
تْفَضَّلْ يا عِصَام مِلْكِي
مِنْ دُونَكْ ما فِي سَكْرَه
عَبِّي بْأَشْعارَك هَـ الْكاسْ
**
