يوم ولادة ماري ـ آن، إبنة أخي جوزاف بعيني 1974
ـ1ـ
مِينْ قالْ بَدِّي غَيْرْ
يِمْشِي مَعِي هَـ الشّغْلْ
وْشِي كمْ رِيشِةْ طَيْرْ
تا طيرْ صَوب الأَهلْ
صَوب اللِّي دَقُّوا جْراسْ
كِرْمالْ طَلِّتْها
وْفِرحْ الزَّهْر.. وِالنَّاسْ
رَقْصُوا بِـ ضَيْعِتْها
وْضَوّوا الْجَبَل وِالسَّهْلْ
ـ2ـ
كانُوا بْقَديم زْمانْ
يْنَقُّوا عَريس الْبِنتْ
يْنَقُّوا قَمَرْ نِيسانْ
يْنَقُّوا وَحِيد السِتّْ
لَكِنْ يا ماري ـ آنْ
عِنْدِك عَريسْ انْ قِلْتْ
إِسْمُو.. صَدَى الْوِدْيانْ
بِيرَدِّدُو عَ السَّكْتْ
بِفْزَعْ لَـ بِنتْ الْغَيْرْ
تِسِرْقُو مِنِّكْ
وِتْبَيِعْدُو عَنِّكْ
إِنْتي يا شَمْعَه بْدَيْرْ
إِنْتي يا أَحْلَى طَيْرْ
بْتِشْرُقْ شَمْس بِاللَّيْل
كِلْ ما ضِحِكْ سِنِّكْ
ـ3ـ
يا هَلْتَرى الأَيَّامْ
بِتْحَقِّق الْمَجْهُولْ
وِمْنِلْتِقِي عَ طُولْ
مِتلْ بَصْر مْنامْ
تَحْت هَـ الأَرْزاتْ
وِبْفَيِّة الشَّرْبِينْ
كَارُولْ وْجُورْجيتْ
وِبّاتْ وِخْرِسْتِينْ
وْسَرْكيس.. مارِيانْ
وْسَاعِتَا بْلُبْنانْ
بْيِضْحَك النِّسْرينْ
وْبَيّ سِتّ شْبابْ
وْأُمّ سِتّ شْبابْ
وِالتَّلْج عَ صنِّينْ
**
