ألقيتها في إحدى حفلات تجمّع المسنين العرب في سيدني
ـ1ـ
يا مِيةْ هَلا بْإِخْوانْ وِمْحِبِّينْ
طَلُّوا تا حَتَّى يِسْمَعُوا أَشْعارْ
بِبانْشبُول.. بِـ مَرْكَز مْسِنِّينْ
صَفَّى عَ تِمّ الْجالْيِه أَلْحانْ
وْصَفَّى بْوَطَنَّا لِلتَّآخِي شْعارْ
ـ2ـ
بْحِبّكُنْ.. لا تِسْأَلُوني لَيْش؟
بْشُوف فِيكُنْ كِلّ أَيَّامي
وْقِدّيْش جِمَّعْتُو سَهَر قِدَّيْش
مِنْشَانْ تِحْلاَ شْوَيّ أَحْلامِي
ـ3ـ
يا هَـ التَّجَمُّعْ فِي إِلَكْ عِنْدِي سُؤَالْ:
لَيْش حُبَّكْ زَاد بِقْلُوب الْبَشَرْ
وْصِرت ضِمْن الْمُجْتَمَعْ قُدْوِه وْمِثَالْ
مْأَكَّدْ لأَنَّكْ بِالْمَسِيح وْبِالنَّبِي
بْتِهْدِي عَ دَرْب الآخْرَه كِلْمِنْ كَفَرْ
ـ4ـ
يِسْلَم تَجَمُّعْ جَامِع الأَحْبابْ
وْيِسْلَمْ رَئيسُو راشِد الْحِلاَّبْ
انْ قالْ: آخْ.. قْلُوبْنا بْتِبْكِي
انْ قالْ: خَيّ.. بْتِرْقُص الضِّحْكِه
وْكِلْمِةْ: يا أَهْلا.. بْتِفْتَح الأَبْوابْ
ـ5ـ
الشِّعْر لَوْلاكُنْ ما إِسْمُو شِِعْرْ
وْبَيْناتْكُنْ زَيْن الْحَسَنْ عَ طُولْ
الْكِلْمِه الْـ بِيقُولاَ لَوْ بْيِمْرُق عُمْرْ
الأَجْيالْ بِتْخَبِّرْ شُو كانْ يْقُولْ
ـ6ـ
وْكامِلْ.. ما بَعْرِفْ لَيْش قَالُوا: مُرّ
عَنُّو.. وْهُوِّي مْنِ الْحَلا أَحْلَى
صَاحِبْ قَلَمْ جَبَّارْ .. فِكْرُو حُرّ
مُخْلِص، وَفِي، إِنْسَان شُو إِنْسانْ
مْزَوَّد بِحُبّ الْكايْنِه وْأَللَّـه
ـ7ـ
وْأَحْمَد، حَبِيب الْقَلْب، هَـ الدَّرْوِيشْ
الْـ خَلَّى الْوَجاهَه تِرْكَعْ قْبالُو
تارِكْ حِمَى بَيْرُوت.. حَتَّى يْعِيشْ
بْأَرْض غُرْبِه.. الْحُبّ رِسْمالُو
**
